Rafiq Ələkbər. Savalanla üz-üzə. Bakı, «Vektor» Beynəlxalq Nəşrlər Evi, 2021.

Torpaqdan yaranıb torpağa çevrilən insanın şəxsiyyət və xarakterinin doğulub boya-başa çatdığı torpağa, onun relyefinə, təbiətinə və bar-bəhərinə bənzəməsi haqqında çoxlu mülahizələr var. Bu mülahizələrin təbii ki, daimi olaraq özünü doğruldanları da var, doğrultmayanları da. Uzun illər dostluq etdiyim, qələminə və şəxsiyyətinə böyük rəğbət bəslədiyim şair Rafiq Ələkbər məncə doğulduğu Yardımlı torpağının təpədən-dırnağa inikasıdır.